ភ្នំពេញ​៖ យោងតាម​សេ​ក្តី​ប្រកាស របស់​អាកាស​យាន្ត​ដ្ឋា​ន​អន្តរជាតិ​ភ្នំពេញ កាលពី​ម្សិលមិញ​នេះ បាន​ឲ្យ​ដឹងថា ចំនួន​អ្នកធ្វើដំណើរ​ឆ្លងកាត់​អាកាស​យន្ត​ដ្ឋា​ន​អន្តរជាតិ​ភ្នំពេញ កើន​ដល់ ៣ លាន​នាក់​ហើយ នេះ​ជា​ចំនួន​ខ្ពស់បំផុត​នៃ​អ្នកធ្វើដំណើរ​ឆ្លងកាត់ ជា​ប្រវត្តិសាស្ត្រ​ក្នុងការ​បំបែក​កំណត់ត្រា​ក្នុង​ឆ្នាំ ២០១៥ នេះ​។​

​អ្នកដំណើរ​បង្គ្រប់​នៃ​ចំនួន​អ្នកធ្វើដំណើរ​ទី ៣​លាន​នោះ​គឺ លោកស្រី គង់ ណា​លៀប ដែល​បានធ្វើ​ដំណើរ​ត្រលប់​មកពី ទីក្រុង​ហុងកុង ប្រទេស​ចិន មកកាន់​កម្ពុជា​វិញ ហើយ​លោកស្រី​ក៏បាន​ទទួល​កាដូ​អនុស្សា​រី​យ៍​ផងដែរ​។​

​តួលេខ​អ្នកធ្វើដំណើរ​ចំនួន ៣​លាន​នាក់​នេះ គឺ​ត្រូវបាន​បូកសរុប​ដោយ​អ្នកធ្វើដំណើរ​អន្តរជាតិ និង​ក្នុងស្រុក​ដែល​បានធ្វើ​ដំណើរ​មកដល់ និង​ចេញដំណើរ​ពី​អាកាស​យាន្ត​ដ្ឋា​ន​ភ្នំពេញ​អន្តរជាតិ ដោយ​គិត​ចាប់តាំងពី​ដើមឆ្នាំ ២០១៥ មក​ម្លេះ​។​

​លទ្ធផល​សម្រេចបាន​នាពេល​បច្ចុប្បន្ននេះ បាន​ឆ្លុះបញ្ចាំង​ពី ភាព​ទាក់ទាញ​នៃ​វិស័យ​ទេសចរណ៍ និង​ភាព​រីកចម្រើន​នៃ​ពាណិជ្ជកម្ម​ក្នុងប្រទេស​កម្ពុជា ព្រមទាំង​បង្ហាញ​ពី​សន្ទុះ​នៃ​ការ​ចរាចរ​ដឹក​អ្នកដំណើរ​របស់​ព្រលានយន្តហោះ​ភ្នំពេញ​អន្តរជាតិ ដែលមាន​កំណើន​ជិត ១៦​ភាគរយ បើ​ប្រៀបធៀប​ទៅនឹង​ឆ្នាំមុន​។ គួរ​ជម្រាប​ថា កាលពី​ឆ្នាំ ២០១៤ អាកាស​យាន្ត​ដ្ឋា​ន​អន្តរជាតិ​ភ្នំពេញ ទទួលបាន​អ្នកដំណើរ ២​លាន ៧​សែន​នាក់​៕